Trepça SH.A. forcon kapacitetet, 25 punonjës të rinj i bashkohen minierës

Mitrovicë, 20 shkurt 2026 11:27

Trepça SH.A. po vazhdon rrugëtimin e saj drejt rritjes dhe konsolidimit të kapaciteteve prodhuese, duke mirëpritur 25 punonjës të rinj, të cilët do të nisin punën më 1 mars 2026 në sektorin e prodhimit në minierë.

Ky hap konsiderohet një tregues i qartë i stabilitetit dhe zhvillimit të ndërmarrjes, e cila mbetet një nga shtyllat kryesore ekonomike të Mitrovicës dhe më gjerë. Punonjësit e rinj do t’i bashkohen ekipit ekzistues, duke forcuar kapacitetet operative dhe duke kontribuar drejtpërdrejt në rritjen e prodhimit.

Drejtori Ekzekutiv, Faton Ahmeti, gjatë pritjes së tyre, uroi mirëseardhje dhe suksese në këtë angazhim profesional, duke theksuar se fuqizimi i burimeve njerëzore është element kyç për zhvillimin e qëndrueshëm të kompanisë. Ai vlerësoi se energjia dhe përkushtimi i punonjësve të rinj do të ndikojnë pozitivisht në performancën dhe perspektivën afatgjatë të ndërmarrjes.

Zgjerimi i stafit shihet si pjesë e një vizioni më të gjerë për modernizim, rritje të prodhimit dhe krijim të vendeve të reja të punës, duke reflektuar një trend pozitiv në funksionimin e kompanisë.

Me këtë hap, Trepça SH.A. po dëshmon se mbetet një motor zhvillimi për rajonin, duke investuar në kapitalin njerëzor dhe duke forcuar themelet për një të ardhme më të qëndrueshme dhe më produktive.