Prishtinë 07 Shtator 2026 10:33
Një grua ka humbur jetën si pasojë e një aksidenti trafiku që ka ndodhur sot në mëngjes në fshatin Loxhë të Pejës.
Zëdhënësi i policisë për rajonin e Pejës, Driton Rugova, ka bërë të ditur se aksidenti ka ndodhur rreth orës 07:50 dhe në të janë përfshirë dy vetura.
“Si pasojë, përveç dëmeve të konsiderueshme materiale, janë lënduar dy persona, të cilët janë dërguar për tretman mjekësor. Nga ekipi mjekësor është konstatuar se njëra nga të aksidentuarat nuk ka mundur t’u përballojë plagëve dhe ka ndërruar jetë”, ka deklaruar Rugova për RTKlive.
Ai ka bërë të ditur se njësitet përkatëse kanë dalë në vendin e ngjarjes dhe kanë nisur hetimet për të sqaruar rrethanat dhe shkaqet e këtij aksidenti.
