Vizita e Jasharit në Ajova, cilësohet sinjal i mbështetjes amerikane për FSK-në drejt NATO-s

Prishtinë, 17 janar 2026 21:13

Gjenerallejtënant Bashkim Jashari u prit me nderime të larta në gardën e Ajovas. Njohësit e sigurisë thonë se SHBA-ja do jetë krah Kosovës vazhdimisht, që ajo të bëhet pjesë e NATO-s.

Fillimisht u bë prezantimi.

Më pas u bë edhe thirrja.

Me entuziazëm të lartë e duartrokitje, kështu u prit në selinë e Gardës Kombëtare të Ajovas, komandanti i Forcës së Sigurisë së Kosovës, Bashkim Jashari, i cili po qëndronte në shtetin e Ajova, tash e disa ditë duke ndjekur programe ushtarake.

Atje, Jashari zhvilloi edhe disa takime, e ndër të tjerash vizitoi edhe bazën e aviacionit ku pa nga afër helikopterët, Black Hawk.

“Gjeneral Jashari pati rastin të takoi Guvernatoren e shteti të Ajovës si dhe kongresmenët dhe senatorit e shtetit të Ajovës, të cilët i falenderoi për mbështetjen e vazhdueshme dhe të pakursyer të SHBA-së për Republikën e Kosovës”, thuhet nga FSK-ja.

Një reagim rreth kësaj vizite pati ministri në detyrë i Mbrojtjes, Ejup Maqedonci.

“Forca e Sigurisë së Kosovës gëzon marrëdhënie të shkëlqyera bashkëpunimi me Iowa National Guard, partneritet i ndërtuar ndër vite mbi besim, profesionalizëm dhe mbështetje të vazhdueshme, i cili ka kontribuar në zhvillimin dhe ngritjen e kapaciteteve të FSK-së”.

Njohësi i sigurisë, Nuredin Ibishi thotë se kjo vizitë tregon mbështetjen e palëkundur të SHBA-së për FSK-në, që të bëhet pjesë e NATO-s.

“E gjithë kjo tregon edhe deklarata e Gjeneral Majorit, Osborn ishte Forca e Sigurisë së Kosovës, shkon drejt një force të armatosur një ushtrie që do të jetë në baza territoriale krahë apo ndërveprim me NATO-në. Kjo tregon një perspektivë të theksuar për anëtarësim të shpejt të Forcës së Sigurisë së Kosovës që kalon fazën e tranzicionit, pra në vitin 2028”, tha Ibishi.

Sipas tij, Forca e Sigurisë së Kosovës, do të pajiset së shpejti me pajisje të tjera ushtarake

“Çfarë pritet këtë vit, pra është dërgesa tashmë e realizuar që do të bartën, Javelinët kontingjenti i parë, edhe normal ato të antiblindës që po vijon në fazën e dërgesës, por sigurisht edhe topat 105mm”.

Forca e Sigurisë së Kosovës është në fazën e tranzicionit që deri më 2028 të kalojë në Forcë Ushtarake, ku pritet të ketë 7.500 trupa, prej të cilëve 5.000 ushtarë të rregullt, 2.500 rezervistë.