Siguria në Mitrovicë shënon përmirësim të dukshëm

Mitrovicë, 16 janar 2026 08:42

Drejtoria Rajonale e Policisë në Mitrovicën e Jugut ka publikuar raportin vjetor për vitin 2025, i cili tregon arritje të rëndësishme në fushën e sigurisë dhe rendit publik në rajon.

Raporti evidenton një rënie prej 4.5% të veprave penale krahasuar me vitin paraprak, ndërsa shkalla e zbardhjes së rasteve ka arritur në 87.5%, një nivel që tregon qëndrueshmëri dhe standard të lartë operacional.

Rëniet më të ndjeshme janë shënuar në kategori kyçe të kriminalitetit: grabitje (-33%), vjedhje të rënda (-18.4%), lëndime trupore (-7.2%), tentativa për vrasje (-80%), dhunë në familje (-6.5%), krim kibernetik (-13%) dhe aksidente trafiku me fatalitet (-20%). Ndërkohë, sekuestrimi i armëve pa leje është rritur për 101.3%, rezultat i kontrolleve dhe aksioneve të synuara policore.

Raporti tregon gjithashtu për përpjekjet parandaluese të Drejtorisë, përfshirë projekte, fushata dhe ligjërata edukative që synojnë parandalimin e kriminalitetit, dhunës në familje, sigurisë në trafik dhe sigurisë digjitale.

Kolonel Afërdita Mikullovci, drejtoresha e Drejtorisë, thekson se rezultatet e arritura janë një sukses kolektiv, i bazuar në punën e përkushtuar të zyrtarëve policorë dhe bashkëpunimin e ngushtë me institucionet partnere. Raporti nënvizon rëndësinë e vazhdimit të këtyre përpjekjeve për të ruajtur rendin dhe sigurinë publike në rajon.