Tabloidët e Vuçiqit i shndërrojnë kriminelët në analistë: Srebrenica, viktimë e rishkrimit të historisë

Beograd, 7 korrik 2025

Vendimi i Tribunalit të Hagës për Srebrenicën është i qartë, por mediat në Serbi e shtrembërojnë konceptin e gjenocidit. DW hetoi metodat e shtrembërimit të realitetit: si u arrit deri në atë pikë dhe cili është rreziku i një raportimi të tillë për Srebrenicën?

Shembujt më të fundit të “zbutjes” së krimeve të luftës të kryera në vitet e 90’ta bëhen të qarta sapo ndizni televizorin, kur shikoni grupin e përhershëm të të ftuarve në media me mbulim të gjerë në Serbi.

Televizioni dhe gazeta Informer udhëheqin. Nëpër emisionet e tyre shpesh paraqesin kriminelë të dënuar si gjoja analistë, si Dragan Vasiljkoviq, ish-udhëheqës i njësisë paraushtarake “Kninxha”, Dragoslav Bokan, ish-kreu i “Shqiponjave të Bardha”, dhe Vojislav Šešelj, udhëheqës i Partisë Radikale Serbe.

Përveç Informer, një rol të madh luan edhe televizioni Happy, si dhe mediat tabloide si Alo, Večernje novosti, Srpski Telegraf, Srbija Danas etj.

Atmosfera e relativizimit të krimeve të luftës arrin kulmin pikërisht në përvjetorët e përkujtimit të tyre, data kyçe është 11 korriku. Viti i kaluar ishte specifik, sepse rezoluta e Kombeve të Bashkuara shpalli 11 korrikun si Ditën Ndërkombëtare të Përkujtimit të Gjenocidit në Srebrenicë. Në Serbi, ata reaguan ndaj kësaj me një fushatë politike. Slogani “Serbët nuk janë një komb gjenocidal” u shfaq në tabela reklamash në të gjithë vendin, megjithëse përfundimet e OKB-së nuk përmendin popullin serb ose përgjegjësinë kolektive.