Për një vit u gjetën mbetje mortore të 16 personave që dyshohen se janë zhdukur gjatë luftës

Prishtinë, 30 dhjetor 2025 08:18

Gjatë këtij viti janë bërë gërmime në 32 lokacione të ndryshme, në kërkim të personave të zhdukur gjatë luftës. Kjo ka rezultuar me gjetjen e mbetjeve mortore të 16 personave që dyshohen se janë zhdukur. Në prezantimin e raportit vjetor të Komisionit Qeveritar për Persona të Zhdukur është thënë se sfidë mbetet mungesa e bashkëpunimit nga Serbia dhe është bërë e ditur se janë siguruar edhe 150 gigabajt materiale mbi të zhdukur nga ish-Tribunali i Hagës.

Në 32 lokacione të kontrolluara gjatë vitit 2025, në 16 prej tyre u gjetën mbetje mortore të personave që dyshohet se u zhdukën me dhunë gjatë luftës. Në 15 raste gërmimet nuk dhanë rezultat, ndërsa një lokacion u vlerësua si jo me interes për gërmime.

Kryetari i Komisionit Qeveritar për persona të zhdukur, Andin Hoti, tha se mosbashkëpunimi i Serbisë mbetet sfidë për zbardhjen e fatit të të pagjeturve dhe se do të vazhdohet presioni që Serbia të pranojë hapjen e arkivave që besohet se përmbajnë të dhëna për mbi 1 571 personat ende të zhdukur.

Drejtori i Institutit të Mjekësisë Ligjore, Ditor Haliti, bëri të ditur se gjatë vitit ky institucion ka përgatitur dosjet e mbetjeve mortore për 27 individë, të cilat më pas u janë dorëzuar familjarëve të tyre. Ai tha se mostra kockore është dërguar për analiza ADN dhe se ka pranuar rezultate për disa prej tyre.

Anëtari i Komisionit, Kushtrim Gara, tha se nga ish-Tribunali i Hagës janë pranuar rreth 150 gigabajt materiale mbi të zhdukur.

Për vitin e ardhshëm u kërkua që të mundësohet kryerja e gërmimeve edhe në disa lokacione në Serbi, përfshirë Batajnicën, ku dyshohet se ndodhen mbetje mortore të 58 personave të zhdukur nga lufta e viteve 1998-1999. Nga kjo luftë, ende janë të zhdukur rreth 1 600 persona.