Dogana vendin e parë për zhdoganim në BP, 135 milionë euro më shumë të hyra

Prishtinë 24 Dhjetor 2025 12:05
Dogana e Kosovës po përmbyll vitin duke qenë institucioni i parë për zhdoganim në Ballkanin Perëndimor. Dogana e Kosovës ka tejkaluar projeksionin për të hyrat vjetore si dhe ka realizuar disa aksione të rëndësishme për luftimin e kontrabandimit.

“Te pjesa e të hyrave kemi pasur projeksionin prej Qeverisë në shumën 1 miliard e 897 milionë euro. Deri në ditën e fundit të këtij viti, do të arrijmë të mbledhim 1 miliard e 968 milionë euro. Kjo shumë përbën 135 milionë euro më shumë sesa viti paraprak dhe tejkalon projeksionin prej 70 milionë euro”, ka thënë drejtori i përgjithshëm, Agron Llugaliu, në konferencën e fundvitit.

Si raste kryesore në luftën kundër krimit dhe mbrojtjes së shoqërisë, Dogana e Kosovës ka veçuar 2 raste të sekuestrimit të kanabisit në sasi prej 397 kilogramësh; një tjetër rast të eksplozivit prej 300 kg; municioneve me 1950 copë; 963 mijë euro të pa deklaruara dhe 61 raste të tjera së bashku me policinë kufitare. Llugaliu ka njoftuar se Kosova vazhdon ta mbajë rekordin e shpejtësisë për zhdoganim në Ballkanin Perëndimor.

“Edhe sivjet sikurse vite me radhë, Dogana e Kosovës mirëmban kohën më të mirë sa i përket zhdoganimit në Ballkanin Perëndimor. Siç e shohim, linja e portokalltë është ajo e Kosovës. Kjo matje bëhet nga sekretariati i CEFTA-s dhe ne vazhdojmë të jemi vendi rekord. Kjo është shumë me rëndësi për shkurtimin e shpenzimeve të bizneseve të prodhuesve tonë por edhe për tërheqjen e investitorëve të huaj”, ka thënë ai.Gjermania me vëllimin tregtar të tregtisë është 1 miliardë e 64 milionë euro, Turqia me 933 milionë euro, Kina me 892 milionë euro, Maqedonia me 468 milionë euro dhe Shqipëria me 426 milionë euro. Këto janë top pesë vendet sa i përket statistikave të tregtisë së ndërsjellë”, ka deklaruar Llugaliu.

Ministri i Financave në detyrë, Hekuran Murati ka thënë se Dogana e Kosovës ka arritur të tejkaloj projeksionet buxhetore duke rritur të hyrat vjetore.

“Kjo ka ardhur si rezultat i luftës pa kompromis ndaj kontrabandës apo rrugëve të tjera ilegale. Është shtuar kontrolli në gjithë territorin e vendit, janë mbyllur rrugët ilegale të kontrabandës dhe Dogana e Kosovës është pajisur me pajisjet më të reja të teknologjisë së fundit sa i përket detektimit të mallrave të kontrabanduara”, tha ai.