Shkollë, banim dhe mbrojtje sociale: projektet e planifikuara nga qeverisja e kaluar në Mitrovicën e Veriut

Mitrovicë e Veriut, 19 dhjetor 2025 15:13

Hapësira e të ashtuquajturit “remont ushtarak” në Mitrovicën e Veriut sot përfaqëson kantierin më të madh ndërtimor në qytet, duke u shndërruar në një zonë kyçe të zhvillimit urban. Projektet që aktualisht po realizohen në këtë lokacion janë rezultat i planifikimit dhe vendimeve të marra gjatë qeverisjes së kaluar, e cila kishte vënë këtë hapësirë në qendër të politikave zhvillimore për veriun e vendit.

Në kuadër të këtyre projekteve, është duke u ndërtuar një shkollë e re, e konceptuar për të ofruar kushte bashkëkohore për arsimimin e fëmijëve dhe për të adresuar mungesën e kapaciteteve shkollore që ka qenë problem për vite me radhë. Ky projekt ishte pjesë e strategjisë afatgjate të qeverisjes së kaluar për përmirësimin e infrastrukturës arsimore në Mitrovicën e Veriut.

Paralelisht, po realizohet edhe ndërtimi i një shtëpie të sigurt për viktimat e dhunës në familje, projekt ky i inicuar po ashtu në mandatin e kaluar qeveritar, me synim forcimin e mbrojtjes sociale dhe krijimin e mekanizmave konkretë për mbështetjen e kategorive më të cenueshme.

Në këtë zonë janë planifikuar dhe po ndërtohen edhe objekte banesore, si pjesë e politikave të mëhershme për strehim të përballueshëm, veçanërisht për çiftet e reja dhe familjet me nevoja sociale.

Edhe pse punimet janë ende në proces, transformimi i kësaj hapësire dëshmon për ndikimin e drejtpërdrejtë të projekteve të konceptuara nga qeverisja e kaluar, duke e shndërruar ish-zonën e pashfrytëzuar në një qendër të re urbane me rëndësi për zhvillimin e Mitrovicës së Veriut në vitet që vijnë.