7 vjet burg për shoferin që shkaktoi aksidentin me dy viktima në Gjakovë

Gjykata Themelore në Gjakovë ka shqiptuar dënim me 7 vjet burg ndaj të pandehurit K. P., për veprën penale “rrezikim i trafikut publik” me pasojë vdekjen.

Vendimi u mor nga gjyqtari Samedin Cena në Departamentin e Përgjithshëm, ka konfirmuar Gjykata Themelore në Gjakovë.

Sipas aktakuzës, aksidenti ka ndodhur më 30 qershor 2022 rreth orës 12:05 në lagjen Dardania. I pandehuri K. P. ka qenë duke drejtuar një veturë të tipit Volkswagen Golf dhe ka tentuar të bëjë një kthesë të rrezikshme nga e djathta në të majtë para marketit “E.”, duke ia marrë përparësinë një autoambulance të QKMF-së që po vinte me drita rrotulluese dhe sirenë të ndezur.

Si pasojë e përplasjes, autoambulanca është rrokullisur pasi ka goditur veturën Golf, dhe më pas është përplasur edhe me automjete të tjera. Aksidenti ka përfunduar tragjikisht: S. Gj. ka ndërruar jetë më 1 korrik, ndërsa M. S. ka ndërruar jetë më 5 korrik 2022.

Në këtë aksident kanë pësuar lëndime të rënda edhe A. A., Z. D. dhe F. B., të cilët janë dërguar menjëherë për trajtim mjekësor, dhe lëndimet e tyre janë konfirmuar me ekspertizë mjekësore.

Përveç dënimit me burg, gjykata i ka shqiptuar të pandehurit edhe ndalesën për drejtimin e automjeteve motorike për një periudhë prej tri vitesh, e cila hyn në fuqi pas vuajtjes së dënimit me burg. Koha e kaluar në paraburgim, nga 30 qershori 2022 deri më 21 nëntor 2023, do t’i llogaritet në dënim.