Banka Botërore ndan 6.8 milionë dollarë shtesë për shëndetësinë në Kosovë

Prishtinë, 30 tetor 2026 16:49

Kosova do të përfitojë një grant shtesë prej 6.8 milionë dollarësh nga Banka Botërore, në kuadër të mbështetjes për zhvillimin dhe modernizimin e sektorit të shëndetësisë.

Lajmin e ka bërë të ditur ministri i Shëndetësisë, Arben Vitia, i cili së bashku me ministrin e Financave, Hekuran Murati, ka pritur përfaqësuesen e Bankës Botërore, Carole Megevand.

Gjatë takimit është nënshkruar marrëveshja për financimin shtesë të projektit KOMPAS.

Sipas ministrit Vitia, fondet e ndara nga Banka Botërore do të orientohen në tri fusha kryesore: digjitalizimin e sistemit shëndetësor, forcimin e kapaciteteve të shëndetit publik dhe modernizimin e shërbimeve shëndetësore.

Ai ka shprehur mirënjohje ndaj Bankës Botërore për mbështetjen e vazhdueshme, duke theksuar se këto investime synojnë rritjen e cilësisë së shërbimeve shëndetësore dhe përmirësimin e kujdesit për qytetarët.

Financimi shtesë pritet të kontribuojë në avancimin e sistemit shëndetësor në Kosovë, veçanërisht në aspektin e infrastrukturës digjitale dhe fuqizimit të shërbimeve publike.