Qelaj: Gjykata Speciale ka shkelur të drejtat e njeriut në rastin e ish-krerëve të UÇK-së

Prishtinë, 30 tetor 2026 18:26

Avokati i Popullit, Naim Qelaj, ka deklaruar se Dhomat e Specializuara në Hagë kanë dështuar në garantimin dhe respektimin e standardeve për një gjykim të drejtë në rastin e katër ish-krerëve të UÇK-së.

Qelaj këto deklarata i bëri gjatë raportimit në Komisionin për të Drejtat e Njeriut, Barazi Gjinore dhe Peticione në Kuvendin e Kosovës, ku u diskutua edhe raporti i Institucionit të Avokatit të Popullit për funksionimin e Dhomave të Specializuara.

Sipas tij, gjetjet e raportit çojnë në përfundimin se janë cenuar të drejtat e njeriut të Hashim Thaçit, Kadri Veselit, Jakup Krasniqit dhe Rexhep Selimit.

“Dhomat e Specializuara në Hagë kanë dështuar për të garantuar respektimin e standardeve për një gjykim të drejtë. Me këtë i kanë shkelur të drejtat e njeriut”, ka deklaruar Qelaj.

Ai ka thënë se Institucioni i Avokatit të Popullit e ka përcjellë çështjen prej vitesh dhe se shqetësimet e ngritura nuk kanë marrë përgjigje të mjaftueshme nga Dhomat e Specializuara. Sipas tij, në raste të ndryshme i është thënë se institucioni që drejton nuk ka mandat për të ndërhyrë në çështjet e Speciales.

Qelaj ka kundërshtuar këtë argument, duke theksuar se të drejtat e njeriut janë universale dhe se roli i Avokatit të Popullit lidhet me vlerësimin e respektimit të tyre.

Ai ka shprehur shqetësim edhe për mungesën, sipas tij, të transparencës dhe llogaridhënies së Dhomave të Specializuara ndaj institucioneve dhe qytetarëve të Kosovës.

Institucioni i Avokatit të Popullit ka bërë të ditur se në raportin e tij janë trajtuar, ndër të tjera, çështjet që lidhen me procesin e drejtë dhe të paanshëm, kohëzgjatjen e paraburgimit, pranueshmërinë e provave, monitorimin e komunikimeve dhe mekanizmat mbikëqyrës.

Ndërkohë, Dhomat e Specializuara kanë kundërshtuar më herët disa interpretime lidhur me raportet për standardet e të drejtave të njeriut, duke theksuar se ato janë institucion gjyqësor i pavarur.