Dorëhiqet drejtori i Përgjithshëm i Policisë së Kosovës, Gazmend Hoxha

Prishtinë, 30 tetor 2026 13:38

Drejtori i Përgjithshëm i Policisë së Kosovës, Gazmend Hoxha, ka dhënë dorëheqje nga detyra.

Lajmi është bërë i ditur sot, ndërsa dorëheqja e Hoxhës vjen pas rastit të vrasjes së Arlinda Zekajt në Vitomiricë të Pejës dhe hetimeve për mënyrën se si institucionet e sigurisë kanë trajtuar rastin.

Sipas njoftimit të Qeverisë së Kosovës, kryeministri Albin Kurti, e ka pranuar kërkesën për dorëheqje të Hoxhës dhe e ka liruar atë nga detyra e drejtorit të Përgjithshëm të Policisë së Kosovës.

Në vend të tij, ushtrues detyre i drejtorit të Përgjithshëm të Policisë është caktuar Fehmi Hoti. Vendimi është marrë pas propozimit të ministrit të Punëve të Brendshme, Xhelal Sveçla, në përputhje me legjislacionin në fuqi.

Dorëheqja e Hoxhës vjen një ditë pasi Inspektorati Policor i Kosovës rekomandoi suspendimin e 11 zyrtarëve policorë në lidhje me trajtimin e rastit të Arlinda Zekajt. Sipas gjetjeve preliminare, janë evidentuar mangësi në zbatimin e urdhrave mbrojtës të lëshuar për viktimën.

Qeveria ka shprehur vlerësim për kontributin dhe angazhimin e Gazmend Hoxhës gjatë mandatit të tij në krye të Policisë së Kosovës.