Heroi i Bondi Beach shpëton jetët e shumë njerëzve gjatë sulmit me armë në Sydney

Prishtinë, 15 dhjetor 2025 08:52

Një burrë i guximshëm i ka shpëtuar jetën shumë personave gjatë një sulmi të armatosur në Bondi Beach, Sydney, duke i marrë armën njërit nga sulmuesit dhe duke e neutralizuar atë. Mediet australiane identifikuan heroin si 43-vjeçarin Ahmed al Ahmed, banor i Sydney-t dhe pronar i një dyqani frutash në Sutherland.

Pamjet e videos së ngjarjes tregojnë momentin kur Ahmed i afrohet sulmuesit nga pas, i merr armën dhe e ndalon sulmin, duke rrezikuar jetën e tij për të shpëtuar të tjerët.

Gjatë incidentit, Ahmed u qëllua në dy vende dhe u dërgua në spital, ku do t’i nënshtrohet një operacioni. Kushëriri i tij, Mustafa, tha për 7News se gjendja e tij ishte e qëndrueshme dhe shtoi: “Shpresojmë të jetë mirë — ai është një hero.” Mustafa gjithashtu deklaroi se Ahmed, baba i dy fëmijëve, nuk ka përvojë me armë zjarri.

Ngjarja ka shkaktuar reagime të gjera në mediat australiane dhe në rrjetet sociale, ku pamjet e sulmit janë shpërndarë gjerësisht. Gazeta The Sydney Morning Herald e ka përshkruar Ahmedin si “një hero që shpëtoi shumë jetë.”

Kryeministri i New South wales, Chris Minns, e lavdëroi veprimin e tij, duke thënë: “Është skena më e pabesueshme që kam parë ndonjëherë. Një burrë i afrohet një personi me armë që kishte qëlluar mbi komunitetin dhe, vetëm, ia hoqi armën, duke rrezikuar jetën e tij për të shpëtuar jetët e pafund të njerëzve të tjerë.”

Sulmi, i drejtuar ndaj australianëve hebrenj, la 11 të vrarë dhe 29 të tjerë të lënduar, përfshirë dy policë. Autoritetet njoftuan se një sulmues u vra, ndërsa një tjetër i lënduar u arrestua. Komuniteti mysliman i Australisë dënoi ngjarjen dhe shprehu solidaritet me viktimat dhe familjet e tyre.

Ahmed al Ahmed tashmë konsiderohet një simbol i guximit dhe heroizmit, ndërsa mediat dhe publiku australian vazhdojnë të nderojnë veprimin e tij të jashtëzakonshëm.