Qendër multifunksionale në Podujevë në vlerë afër 1 milion euro

Podujevë, 11 dhjetor 2025 19:45

Punimet në Qendrën Multifunksionale afrojnë qytetin me hapësirën më të re publike

Ndërtimi i Qendrës së re Multifunksionale në Podujevë po hyn në fazën e avancuar, teksa projektit me vlerë rreth 1 milion euro po i shtohen çdo ditë elemente të reja ndërtimore. Sipas kryeministrit të Kosovës, Albin Kurti, aktualisht po kryhen punime në fasadën e objektit, dysheme, tavanin e lëshuar, suvatimin e kupolës si dhe ndarjet e brendshme me profile.

“Ndërtimi i Qendrës Multifunksionale në Podujevë ka vlerën prej afër 1 milion euro. Punimet në këtë projekt po vazhdojnë me ndërhyrjet në: – Fasadën e objektit; – Dysheme; – Tavanit të lëshuar; – Suvatimin e kupolës; – Ndarjet e brendshme me profile. Qytetarët e Podujevës do ta kenë së shpejti një qendër multifunksionale bashkëkohore ku do të mund të organizohen dhe mbahen ngjarje të rëndësishme për jetën e qytetit”, ka njoftuar kryeministri Kurti nëpërmjet një postimi në facebook, ku ka shpërndarë edhe disa fotografi të projektit.

Me përfundimin e punimeve, qytetarët e Podujevës do të kenë në dispozicion një infrastrukturë moderne që synon të ndikojë drejtpërdrejt në gjallërimin e jetës urbane dhe zhvillimin e aktiviteteve nga ana e qytetarëve dhe komunës.