Lista Serbe publikon kandidatët për deputetë, riafirmon nacionalizmin e saj

Prishtinë, 09 dhjetor 2025 08:14

Pas përfundimit të afatit për dorëzimin e listave të partive politike, të gjitha subjektet që garojnë në zgjedhjet e 28 dhjetorit kanë dorëzuar kandidatët e tyre në Komisionin Qendror të Zgjedhjeve. Ndërkaq, Lista Serbe e ka bërë publik lajmin përmes llogarisë së saj në Instagram, duke njoftuar dorëzimin e listës me 33 kandidatë për deputetë në Kuvendin e Republikës së Kosovës.

Kryesues i listës është presidenti i partisë, Zlatan Elek, ndërsa në prezantimin zyrtar Lista Serbe e përshkruan këtë grup si njerëz “të suksesshëm në planin familjar dhe profesional, me reputacion dhe njohuri, që gëzojnë respektin e popullit serb në Kosovë dhe Metohi”. Përdorimi i shprehjes “Kosova e Metohi” rikthen një retorikë nacionaliste që është e ndaluar dhe e kontestuar, duke evidentuar një qëndrim politik që sfidon shtetin e Kosovës dhe integritetin e tij territorial.

Shprehja e tillë që është vazhdimësi e saj, vë në dukje se Lista Serbe, edhe përmes përzgjedhjes së kandidatëve, vazhdon të promovojë agjendën e nacionalizmit serb, duke u përpjekur të riafirmojë lidhjen e serbëve lokalë me Beogradin dhe duke marginalizuar shtetësinë e Kosovës. Ky zhvillim ngre pyetje për qëndrimin e Listës Serbe ndaj institucioneve të Kosovës dhe mundësinë e ndikimit të politikës nacionaliste në proceset demokratike.

Zgjedhjet e 28 dhjetorit pritet të jenë një test i rëndësishëm për nivelin e përfaqësimit të komuniteteve dhe përballimin e retorikës nacionaliste që Lista Serbe vazhdon ta përdorë si mjet politik.