Investime për modernizimin e Termocentralit “Kosova B”

Prishtinë, 1 dhjetor 2025 09:59

Zyra e Bashkimit Evropian në Kosovë ka bërë të ditur se puna për instalimin e filtrave të rinj në Termocentralin “Kosova B” pritet të fillojë në prill të vitit 2026, pasi tashmë janë përmbushur të gjitha kushtet e nevojshme për realizimin e projektit.

Ky investim, i financuar nga BE-ja, synon të ulë në mënyrë të ndjeshme emetimet e pluhurit dhe oksideve të azotit (NOx), duke kontribuar drejtpërdrejt në përmirësimin e cilësisë së ajrit në gjithë territorin e Kosovës dhe më gjerë në rajon. Projekti vlerësohet si një hap i rëndësishëm drejt modernizimit të infrastrukturës energjetike dhe forcimit të standardeve mjedisore të vendit.

Bashkimi Evropian rikujton se vazhdon të jetë partneri kryesor i Kosovës, me rreth 3.7 miliardë euro të investuara që nga viti 1999.

“Me kushtet e përmbushura, punimet për instalimin e filtrave të financuar nga BE-ja në Termocentralin ‘Kosova B’ do të fillojnë në prill 2026. Ky investim i madh do të zvogëlojë ndjeshëm emetimet e pluhurit dhe oksideve të azotit – NOx – dhe do të përmirësojë cilësinë e ajrit në të gjithë Kosovën dhe rajonin. Me 3.7 miliardë euro të investuara në Kosovë që nga viti 1999, BE-ja mbetet partneri më i fortë i Kosovës dhe ofruesi më i madh i ndihmës financiare”, thuhet në njoftimin e BE-së.

Nëpërmjet këtij projekti, institucionet evropiane synojnë të mbështesin Kosovën në tranzicionin e saj drejt standardeve më të larta mjedisore dhe energjetike.