BE reagon për protestat në Serbi: Kërkon hetim të forcës së tepërt dhe mbrojtje të të drejtave themelore

Beograd, 01 Korrik 2025

Komisioni Evropian ka reaguar ndaj ngjarjeve të ditëve të fundit në Serbi. Nga kjo zyrë thonë se janë duke monitoruar nga afër protestat në Serbi, ku ka pasur raste të përdorimit të forcës kundër demonstruesve, arrestime masive dhe akuza kundër studentëve për organizimin e supozuar të një përpjekjeje për grusht shteti.

“Po e monitorojmë nga afër situatën. Dënojmë fuqimisht çdo akt urrejtjeje dhe dhune. E drejta për tubim paqësor duhet të mbrohet”, tha zëdhënësi i Komisionit të BE-së, Guillaume Mercier.

Në përgjigje të pyetjes së N1 nëse veprimet e fundit nga institucionet shtetërore serbe janë në përputhje me rregullat dhe vlerat e Bashkimit Evropian, zëdhënësi i Komisionit nuk u përgjigj drejtpërdrejt, por kujtoi parimet themelore evropiane.

“Ndërhyrja e policisë duhet të jetë proporcionale dhe në përputhje me të drejtat themelore, duke përfshirë të drejtat e të gjithë të arrestuarve. Ne presim një hetim të shpejtë, transparent dhe të besueshëm për akuzat për përdorim të tepërt të forcës, si dhe respektimin e procedurave të drejta për të gjithë të ndaluarit”, tha Mercier.