Konfiskohen pajisje telefonike në vlerë prej 60 mijë eurosh gjatë një aksioni të përbashkët të Doganës dhe Policisë (Video)

Prishtinë, 12 nëntor 2025 18:49

Njësitë Antikontrabandë të Doganës së Kosovës, në bashkëpunim me Sektorin e Hetimeve të Departamentit të Policisë Kufitare në kuadër të Drejtorisë së Përgjithshme, kanë zhvilluar një aksion të papritur në një subjekt tregtar që merrej me shitjen e pajisjeve telefonike.

Gjatë kontrollit, zyrtarët doganorë dhe policorë kanë zbuluar dhe konfiskuar 120 telefona celularë të markave iPhone dhe Samsung, 5 ora të mençura Apple si dhe disa kufje origjinale të të njëjtës markë.

Sipas vlerësimeve fillestare, vlera e përgjithshme e mallit të konfiskuar arrin rreth 60 mijë euro.

Nga Dogana e Kosovës është bërë e ditur se ky operacion është pjesë e angazhimeve të përbashkëta me Policinë e Kosovës në luftimin e kontrabandës dhe krimeve ekonomike, me synim mbrojtjen e tregut të brendshëm, interesave fiskale të shtetit dhe nxitjen e konkurrencës së ndershme.

Doganat dhe Policia kanë paralajmëruar se kontrollet e tilla do të vazhdojnë edhe në ditët në vijim në gjithë territorin e vendit.