Qytet në zhvillim: Mitrovica e Veriut krijon më shumë gjelbërim dhe gëzim për fëmijët

Mitrovicë e Veriut, 3 nëntor 2025

Komuna e Mitrovicës së Veriut po përmbyll me sukses projektet kapitale gjatë këtij viti kalendarik, në dobi të qytetarëve. Këto projekte janë financuar kryesisht nga buxheti publik i komunës, por edhe përmes bashkëfinancimit me donatorë dhe organizata ndërkombëtare.

Pas përfundimit, pak javë më parë, të parkut publik, këto ditë ka përfunduar edhe ndërtimi i parkut për fëmijë pranë “Tre Rrokaqiejve” dhe “Kodrës së Minatorëve”.

Në njoftimin për publikun, Komuna e Mitrovicës së Veriut bën të ditur se, falë implementimit nga organizata SIT dhe financimit nga DRC, është përfunduar me sukses renovimi i parkut për fëmijë në zonën e “Tre Rrokaqiejve” dhe “Kodrës së Minatorëve”.

“Ky projekt u realizua në bashkëpunim mes Drejtorisë për Kulturë, Rini dhe Sport dhe organizatës SIT, duke krijuar një hapësirë më të sigurt dhe më të këndshme për lojë dhe relaksim për fëmijët dhe komunitetin.
Në kuadër të këtij projekti janë kryer restaurimi i ulëseve, vendosja e koshave për mbeturina, si dhe pastrimi i shkallëve, duke siguruar një mjedis më të pastër dhe më të rregullt për banorët e zonës”, thuhet në njoftim.

Vëmendje e veçantë i është kushtuar hapësirave publike – theksohet në njoftim – duke shtuar se, falë bashkëpunimit me qytetarët, qyteti po bëhet çdo ditë më i gjelbër, më i pastër dhe më mikpritës për të gjithë.