Komuna e Gjilanit vendos kamera në qytet, “që ekzistojnë vetëm në Londër dhe New York”

Gjilan 27 Tetor 2025

Komuna e Gjilanit ka njoftuar se ka vendosur sisteme kamerash në rrugët publike të teknologjisë së fundit.
Sipas njoftimit të komunës ky sistem i kamerave që ekziston vetëm në Londër e New York mundëson identifikimin automatik të targave të automjeteve (ANPR) dhe integron të gjitha kamerat në një platformë të vetme menaxhimi.
Kryetari i Komunës së Gjilanit, Alban Hyseni, tha se tash ka më shumë siguri për Gjilanin tonë.
“Kemi pranuar një donacion të rëndësishëm nga miqtë tanë në Angli për zgjerimin dhe modernizimin e rrjetit të kamerave në qytet”, tha Alban Hyseni.
I pari i Gjilanit, theksoi se ky sistem i gjeneratës së fundit, me rezolucion të lartë dhe inteligjencë artificiale (AI), mundëson identifikimin automatik të targave të automjeteve (ANPR) dhe integron të gjitha kamerat në një platformë të vetme menaxhimi.
“Për momentin, këto sisteme kamerash ekzistojnë vetëm në Londër e New York, e nga sot edhe në Gjilanin tonë”, tha Hyseni, thuhet në komunikatë.
Kryetari i Gjilanit, më tej shtoi se një donacion shumë i vlefshëm si ky, do ta rrisë dukshëm sigurinë publike të qytetit tonë dhe është hap i madh për një Gjilan më të sigurt dhe më modern.
Ai falënderoi nga zemra për donacionin miqtë nga Anglia.