Mitrovica e Veriut rrit ndjeshëm të hyrat vetanake

Mitrovicë e Veriut, 27 tetor 2025

Sipas të dhënave të Drejtorisë për Buxhet dhe Financa të Komunës së Mitrovicës së Veriut, gjatë këtij viti është shënuar një rritje e ndjeshme e të hyrave vetanake krahasuar me dy vitet e mëparshme.
Të hyrat e përgjithshme për vitin 2025 arrijnë në 147.849 euro, që është më shumë se dyfish në krahasim me vitin 2024, kur të hyrat ishin 73.939 euro, dhe madje më shumë se pesëfish krahasuar me vitin 2023.

Rritja më e madhe është regjistruar në muajin shtator, kur të hyrat vetanake arritën në 58.337 euro, që paraqet një rritje prej 417% krahasuar me të njëjtin muaj të vitit të kaluar. Një rritje e konsiderueshme është vërejtur edhe gjatë muajve korrik dhe gusht, kur të hyrat ishin mbi 200% më të larta në krahasim me vitin 2024.

Këto rezultate tregojnë për përmirësim të disiplinës fiskale, mbledhje më efikase të taksave lokale, si dhe për forcim të ekonomisë lokale. Rritja e të hyrave vetanake i mundëson komunës të investojë më shumë në infrastrukturë, shërbime publike dhe projekte zhvillimore me rëndësi për qytetarët.

Drejtoria për Buxhet dhe Zhvillim Ekonomik thekson se është planifikuar që deri në fund të vitit të arrihet një nivel edhe më i lartë i mbledhjes së të hyrave, me ç’rast Mitrovica e Veriut do të forcojë më tej pavarësinë financiare dhe stabilitetin e financave publike lokale.