Caktohet seanca ndaj tre serbëve që dyshohen për krime lufte në Kosovë, gjykata iu bën thirrje të dorëzohen

Prishtinë 15 Tetor

Gjykata Themelore në Prishtinë ka njoftuar se ka caktuar seancën e shqyrtimit fillestar ndaj tre të pandehurve serbë, të dyshuar për krime lufte kundër popullsisë civile.

Bëhet fjalë për të pandehurit Dušan Gavranič, Zoran Šarac dhe Žarko Cvetanovič. Sipas propozimit të Prokurorisë Speciale të Republikës së Kosovës, gjykimi në këtë çështje do të zhvillohet në mungesë të tyre, pasi që të pandehurit kanë qenë të paarritshëm deri në momentin e ngritjes së aktakuzës.

Në komunikatë, Gjykata Themelore iu ka bërë thirrje të tre të pandehurve që të paraqiten dhe të dorëzohen para organeve të ndjekjes së Republikës së Kosovës.

“Për këtë arsye, përmes kësaj komunikate ju bëhet thirrje të pandehurve Dušan Gavranič, Zoran Šarac dhe Žarko Cvetanovič, që të paraqiten dhe të dorëzohen para organeve të ndjekjes së Republikës së Kosovës. Gjithashtu, u bëhet thirrje të gjithë personave që posedojnë informacione relevante lidhur me vendndodhjen e të akuzuarve, që t’i komunikojnë këto informacione Policisë së Kosovës apo organeve tjera kompetente,” thuhet në njoftim.

Seanca e shqyrtimit fillestar është caktuar të mbahet më 22 dhjetor, në ora 13:15.

Gjykata ka bërë të ditur se do të vazhdojë të informojë opinionin publik për zhvillimet e mëtejshme lidhur me këtë çështje penale.