Arrestime dhe tensione në Serbi para tubimit të madh të paralajmëruar për të shtunën

Beograd, 26 Qershor 2025

Policia në Serbi ka arrestuar disa persona të akuzuar se kanë komplotuar rrëzimin e qeverisë, mes tensionesh para tubimit të madh anti-qeveri këtë fundjavë në Beograd.

Policia ka thënë se gjashtë persona u arrestuan të mërkurën nën dyshimin për “përgatitje të akteve kriminale kundër rendit kushtetues dhe sigurisë së Serbisë” dhe “thirrjen për ndryshim të dhunshëm të rendit kushtetues”.

Të paktën një student u arrestua në fillim të javës me akuzën për përgatitje të “një akti terrorist” bazuar në bisedat private në telefon. Qindra kanë protestuar të enjten kundër arrestimit.

Studentët kanë thirrur protestën e së shtunës me kërkesën për zgjedhje të parakohshme.

Presidenti Aleksandër Vuçiq ka refuzuar kërkesën për zgjedhje, duke akuzuar protestuesit se po planifikojnë të nxisin dhunë në tubimin e së shtunës.