Ministri Sveçla: Koha e spiunëve të Serbisë në Kosovë ka përfunduar

Prishtinë, 9 tetor 2025

Pas arrestimit të sotëm nga Policia e Kosovës me urdhër të Prokurorisë, të Fatmir Shehollit, nën dyshimet për spiunazh, ka reaguar ministri në detyrë i Punëve të Brendshme, Xhelal Sveçla, i cili ka thënë se arrestimi u bë pas një bashkëpunimi të ngushtë mes Policisë së Kosovës, AKI-së dhe Prokurorisë së Kosovës.

“Pres trajtim institucional me seriozitet të lartë të këtij rasti, i cili përbën një nga aktet më të rënda ndaj sigurisë dhe rendit kushtetues të Republikës së Kosovës.

Individë si ky që kanë pasur hapësira mediatike të pakufizuara në vendin tonë ka bashkëpunuar me akterë që çdo ditë punojnë e veprojnë për të minuar Republikën tonë dhe progresin e saj”, ka shkruar ministri Sveçla në profilin e tij në facebook.

Sipas tij, Qeveria e Kosovës mbetet e përkushtuar të mbrojë vendin tonë nga të gjitha qarqet që nuk hezitojnë ta rrezikojnë atë për çfarëdo përfitimi të tyre.

“Koha e spiunëve të Serbisë në Kosovë ka përfunduar. Kushdo që punon për Serbinë e kundër Kosovës do të ndiqet pa kompromis e pandalshëm. Republika duhet mbrojtur me përgjegjësinë më të lartë institucionale dhe morale”, ka thënë ministri i Punëve të Brendshme, Xhelal Sveçla.