Qytetarët e Mitrovicës së Veriut: Më e rëndësishme është jeta normale, jo alfabeti

Mitrovicë e Veriut, 8 tetor 2025

Ndryshimi i mbishkrimeve publike në Mitrovicën e Veriut – nga cirilikë në latinicë – ka shkaktuar reagime të ndara mes qytetarëve.
Ndërsa një pjesë e banorëve reagojnë ashpër ndaj zëvendësimit të tabelave në cirilikë me ato në latinicë, ka edhe nga ata që nuk e shohin këtë ndryshim si problem. Për ta, çështja e alfabetit nuk ka rëndësi vendimtare – më e rëndësishme është që qyteti të funksionojë, të ketë stabilitet, paqe dhe jetë normale.
Qytetarja e Mitrovicës së Veriut, Tanja Maksimoviq, thotë se ndryshimi i alfabetit nuk përbën problem për të.
“Mua më është krejt njësoj nëse shkruhet me latinicë apo cirilikë. E rëndësishme është që rrugët të jenë të rregulluara, të ketë ndriçim dhe që njerëzit të ndihen të sigurt. Mendoj se temat simbolike, si mbishkrimet, shpesh ekzagjerohen dhe nuk duhet të shkaktojnë tensione mes komuniteteve. Më shumë vëmendje duhet t’u kushtohet problemeve konkrete – ekonomisë, punësimit, infrastrukturës dhe nevojave të përditshme të banorëve”, thotë Maksimoviq.
Të njëjtin mendim ndan edhe një profesor i Shkollës së Mjekësisë, M.N., i cili thekson se alfabeti nuk e ndryshon thelbin e identitetit – nuk ndryshon se kush jemi, por si jetojmë.
“Mendoj po ashtu se, nëse kjo mund të përmirësojë marrëdhëniet – pse jo? Ky ndryshim është pjesë e procesit të modernizimit dhe harmonizimit administrativ me rregulloret e Republikës së Kosovës, dhe jo një akt politik. Situata të ngjashme ekzistojnë edhe në mjedise të tjera shumëgjuhëshe. Edhe cirilica, edhe latinica janë alfabetet tona – e rëndësishme është të kuptohemi mes vete dhe të jetojmë normalisht. Nëse kjo ndihmon në uljen e tensioneve dhe në përparimin e qytetit, atëherë është gjë e mirë”, përfundon profesori.