SHBA kundër rishkrimit të kufijve në Ballkan,mbështet dialogun Kosovë–Serbi

Prishtinë 4 Tetor 2025

Senatorët amerikanë Thom Tillis dhe Jeanne Shaheen kanë paraqitur një amendament në kuadër të Aktit të Autorizimit të Mbrojtjes për vitin 2026, i cili synon të forcojë rolin e Shteteve të Bashkuara në procesin e normalizimit të marrëdhënieve ndërmjet Kosovës dhe Serbisë.

Ky amendament përfshin mbështetjen e SHBA-së për njohjen reciproke midis dy vendeve, si dhe refuzimin e çdo politike që nxit ndarjen e territoreve.

Në përmbajtjen e Nenit 1280 të një dokumenti zyrtar të miratuar së fundmi, theksohet se Serbia dhe Kosova duhet të angazhohen për përparim të menjëhershëm në Aneksin e Zbatimit të kësaj marrëveshjeje. Pasi të arrihet një nivel i kënaqshëm zbatimi, Shtetet e Bashkuara pritet të shqyrtojnë nisma për forcimin e marrëdhënieve dypalëshe me të dyja vendet, përfshirë krijimin e dialogëve strategjikë dhe nisma konkrete për rritjen e bashkëpunimit ekonomik dhe investimeve.

Dokumenti nënvizon gjithashtu se politika zyrtare e SHBA-ve është e orientuar drejt arritjes së një marrëveshjeje përfundimtare gjithëpërfshirëse midis Kosovës dhe Serbisë, të bazuar në njohje reciproke.

Në të njëjtin nen, Shtetet e Bashkuara shprehin qartë kundërshtimin ndaj çdo forme të ndarjes territoriale ose rishkrimit të kufijve mbi baza etnike në Ballkanin Perëndimor, duke e cilësuar këtë si një qasje të papranueshme për zgjidhjen e mosmarrëveshjeve ndërshtetërore.

Po ashtu, SHBA-të theksojnë rëndësinë e mbështetjes për demokracitë pluraliste në vendet e rajonit, si mënyrë për të parandaluar rikthimin e konflikteve etnike dhe për të garantuar një të ardhme të qëndrueshme për të gjitha komunitetet.