U vendos gurthemeli për shkollën shqipe në Mitrovicën e Veriut

Mitrovicë e Veriut 3   Tetor 2025

Kryetari i Mitrovicës së Veriut, Erden Atiq, ka njoftuar se sot në Lagjen Boshnjake është vendosur gurthemeli për shkollën e parë shqipe.

Sot, së bashku me kryeministrin Albin Kurti, Xhelal Sveçlën, Arbërie Nagavci dhe Faton Peci, vendosëm gurthemelin për shkollën e parë shqipe në lagjen Boshnjake të Mitrovicës së Veriut, që paraqet një hap historik për arsimin dhe të ardhmen e fëmijëve tanë”, ka shkruar Atiq në një postim në Facebook.

Shkolla e re, e cila do të ketë 9 klasë, do të ofrojë një ambient modern, të sigurt dhe frymëzues për të mësuar, ka theksuar ai.

Në të njëjtin objekt do të hapet edhe një çerdhe, duke ofruar mbështetje për familjet dhe fëmijët e komunitetit, ka shtuar Atiq.

“Me këtë gurthemel, ne po ndërtojmë të ardhmen, dijen dhe shpresën për një gjeneratë të re të qytetit tonë”, ka theksuar Atiq, i cili është gjithashtu një nga kandidatët për kryetar të Mitrovicës së Veriut.

Sipas fotografive të publikuara nga Atiq, gurthemeli për ndërtimin e objektit të ri shkollor është vendosur në hapësirën e “Remontit Ushtarak”.