Ajeti: Është punuar shumë që të largohet ndikimi i Radojçiqit

Graçanicë, 29 shtator 2025

Kandidati për kryetar të Komunës së Graçanicës, nga Alenca Shqiptare, Leutrim Ajeti, që njëherit është edhe nënkryetar i kësaj komune, në një intervistë në TV Dukagjini, thotë se gjatë këtij mandati, duke u bërë bashkë shqipatarët, dhe jo vetëm, është arrit të largohet ndikimi i Milan Radojçiqit nga jeta politike, shoqërore e kulturore në këtë komunë.

Kjo, siç shprehet ai, është arritur falë angazhimit dhe punës për t’i trajtuar në mënyrë të barabartë të gjithë qytetarët e komunës së Graçanicës.

“Aleanca Shqiptare në Graçanicë, dikush mund të mendojë që është themeluar tash së voni, mirëpo kjo është diçka që është synuar para shumë vitesh. Prej momentit kur kam marrë pozitën e nënkryetarit, prej këtu fillon bashkimi i forcave në Graçanicë, sepse kam qenë i hapur për të gjithë, për të gjitha komunitetet. Në veçanti shqiptarët kanë pasur një adresë, dhe nuk kanë shikuar më parti. Kjo ka qenë ajo që na ka bërë bashkë”, është shprehur Ajeti, i bindur se kjo aleancë do të tregojë se ata që mendojnë të bëjnë presion, nuk do të mund t’ia arrijnë, ngase, siç shprehet ai, ne do të punojmë me të gjitha komunitetet.

Gjatë këtij mandati, nënkryetari i Graçanicës, ka realizuar një sërë kërkesash nga qytetarët e kësaj komune, madje ka arrit të sigurojë fonde nga niveli qendror që të asfaltojë rrugë dhe të realizojë projekte kapitale në dobi të qytetarëve.

Me theks të vëçantë përmend rrugën në Shushicë, përkatësisht deri te kisha, por edhe rrugë tjera në lagjen e romëve.

“Banorët e Graçanicës dhe lagjet e saj do të bashkohen këtë herë për të votuar Aleancën për Shqiptarët, që mbetet adresa e vetme e zhvillimit të komunës dhe ngritjes së mirëqenies së qytetarëve që jetojnë në këtë komunë”, thotë Ajeti në intervsitë.