Sot bëhen 34 vjet nga referendumi për shpalljen e Kosovës shtet të pavarur

Prishtinë, 26 shtator 2025

Më 26 shtator 1991, u mbajt referendumi për shpalljen e Kosovës si shtet i pavarur, në të cilin shumica absolute e qytetarëve u deklarua në favor të pavarësisë.

Në bazë të rezultateve të referendumit, u konfirmuan edhe Deklarata e Pavarësisë si dhe Kushtetuta e Republikës së Kosovës, të cilat ishin miratuar një vit më herët. Ky akt ishte hyrje për zgjedhjet e para parlamentare dhe presidenciale demokratike, të mbajtura në vitin 1992.

Kështu, sot, më 26 shtator 2025, shënohen 34 vjet nga referendumi historik, i cili ishte hap kyç drejt realizimit të aspiratës së popullit të Kosovës për pavarësi.

Në dokumentet ndërkombëtare, referendumi për pavarësinë e Kosovës është shënuar si një akt i lartë i vullnetit politik të popullit të Kosovës.