EO: Kosova për herë të parë me të drejtë vote në Asamblenë e Përgjithshme të Komitetit Ndërkombëtar Paralimpik

Prishtinë 25 Shtator 2025

Presidentja e Komitetit Paralimpik të Kosovës, Njomza Emini, përfaqëson Kosovën në Asamblenë e Përgjithshme të Komitetit Ndërkombëtar Paralimpik në Seul

Presidentja e Komitetit Paralimpik të Kosovës, Njomza Emini, e cila gjithashtu është anëtare e Bordit Drejtues të Komitetit Paralimpik Evropian, po përfaqëson Kosovën në Asamblenë e Përgjithshme të Komitetit Ndërkombëtar Paralimpik (KNP) që po mbahet në Seul, Koreja e Jugut.

Për herë të parë, Kosova merr pjesë si anëtare me të drejtë vote në këtë asamble, gjë që përfaqëson një „hap të rëndësishëm për prezencën ndërkombëtare të sportistëve tanë me aftësi të kufizuara“.

„Ky pjesëmarrje e plotë jo vetëm që forcon pozicionin e Kosovës brenda strukturave të lëvizjes globale paralimpike, por gjithashtu jep një zë të drejtpërdrejtë në proceset vendimmarrëse që ndikojnë në të ardhmen e sportit paralimpik në nivel botëror. Ky është një sukses i përbashkët i të gjithë sportistëve paralimpikë, komunitetit dhe partnerëve të Komitetit tonë“, deklaroi Emini.

Një nga momentet kryesore të kësaj Asambleje është edhe votimi për presidentin e ri të KNP-së, ku Kosova për herë të parë përdor të drejtën e saj të vote.

Komiteti Paralimpik i Kosovës ka regjistruar një seri suksesesh në prezantimin ndërkombëtar gjatë viteve të fundit, duke u anëtarësuar në të gjitha institucionet relevante ndërkombëtare të sportit paralimpik.

Së fundmi, presidentja e KPK-së u zgjodh anëtare e bordit ekzekutiv të Komitetit Paralimpik Evropian, duke siguruar një vend për Kosovën në tryezën ku merren vendimet më të rëndësishme për sportin paralimpik në kontinent.