Gërvalla në takimin e Kartës së Adriatikut A5: Kosova kontribuon me institucione të forta sigurie dhe vullnet për bashkëpunim rajonal

Prishtinë, 24 shtator 2025

Zëvendëskryeministrja dhe Ministrja në detyrë e Punëve të Jashtme dhe Diasporës, Donika Gërvalla, në kuadër të punimeve të Asamblesë së Përgjithshme të OKB-së në Nju Jork, mori pjesë sot në takimin e Kartës
së Adriatikut (A5).

Në fjalën e saj, ministrja Gërvalla theksoi se Republika e Kosovës vjen në këtë format me institucione të forta të sigurisë, me një angazhim të palëkundur kundër korrupsionit dhe me vullnet për bashkëpunim të thelluar
rajonal, duke pasur fqinjësinë e mirë si parim dhe si garanci sigurie.

Ministrja Gërvalla kërkoi hapjen e procesit teknik për anëtarësimin e plotë të Kosovës në Kartën A5, duke theksuar rolin aktiv të Kosovës si vëzhguese që nga viti 2012 dhe kontributin konkret për sigurinë dhe stabilitetin
rajonal.

Gërvalla nënvizoi se Republika e Kosovës mbetet e përkushtuar ndaj demokracisë funksionale, sundimit të ligjit, sigurisë dhe integrimit euro-atlantik, në kontrast me kursin destabilizues të Serbisë, e cila përmes
aleancave autokratike dhe veprimeve agresive rrezikon stabilitetin e rajonit.

Duke rikujtuar sulmin e 24 shtatorit 2023 në Banjskë, ku u vra rreshteri i Policisë së Kosovës, heroi Afrim Bunjaku, ministrja Gërvalla theksoi se ky akt përbën një dëshmi të qartë të politikave destruktive të Serbisë
ndaj Kosovës dhe rajonit.

Ajo kërkoi nga vendet anëtare të A5 një dënim të qartë të sulmit në Banjskë, si dhe kërkoi përgjegjësi për autorët dhe mbështetësit e këtij akti agresioni.

Njëkohësisht, ministrja ngriti shqetësimin për ndalimet arbitrare të qytetarëve të Kosovës nga Serbia, duke i cilësuar ato si shkelje të lirive themelore dhe standardeve evropiane.

Në fund, ministrja theksoi përkushtimin e Kosovës për të qëndruar krah Ukrainës dhe popullit ukrainas deri në fitoren e tyre, duke e konsideruar këtë si mbrojtje të rendit demokratik evropian, përballë kërcënimeve
hibride, sulmeve kibernetike dhe fushatave dezinformuese me të cilat ballafaqohet edhe Kosova.