Arsenijeviq mohon lidhjen me armët e gjetura, autoritetet theksojnë seriozitetin e hetimeve

Aleksandar Arsenijevic, lider i njohur i opozitës nga partia Demokracia serbe, ka reaguar pas njoftimit të ministrit të Brendshëm të Kosovës, Xhelal Sveçla, se në një objekt që i përket atij janë gjetur armë.

“Është një inskenim klasik politik për të më përjashtuar nga skena,” tha Arsenijevic për Alternativën. Ai shtoi se stalla ku u gjetën armët ka qenë e hapur që nga tetori i vitit të kaluar, dhe se kali i tij ka qenë aty vetëm 15 ditë më parë.

Ai theksoi veçanërisht se banorët e fshatit Valaç kishin njoftuar policinë muajin e kaluar për lëvizje të dyshimta të personave të panjohur në atë zonë.

Arsenijevic tha gjithashtu se një vit më parë kishte informuar zëvendës komandantin e Policisë së Kosovës për Veri, Veton Eljshanin, për kërcënimet në lidhje me objektet në Mali Zveçan ku kishte qëndruar më parë.

“Për këtë arsye mendoj se është një inskenim klasik. Videoja me flamurin rus që publikoi ministri Sveçla më tronditi edhe më shumë dhe e shoh si një argument shtesë që kjo është një ngjarje e inskenuar,” tha ai.

Kur u pyet nëse beson se kjo ka lidhje me zgjedhjet lokale që po afrojnë, Arsenijevic u përgjigj me po.

“Plotësisht. Qartazi kjo hap rrugën për opsione të tjera politike, duke lënë serbët të pambrojtur,” tha ai.

Ai gjithashtu konfirmoi se në momentin e bastisjes nuk ishte në Kosovë, por kishte udhëtuar nga Kosova të premten dhe lajmin e mori në rrugë për në familjen e tij në Sombor.

“Nuk kam shkuar asnjëherë në një poligon të lejuar për të shtënë me armë, e jo më që të kem ndonjë armë pranë. Nëse do të vëreja diçka të dyshimtë, vetë do ta kisha raportuar në polici,” shtoi Arsenijevic.

Ai komentoi edhe pjesën e deklaratës së policisë ku thuhet se kanë vepruar pas marrjes së informacionit.

“Një dëshmitar gjatë bastisjes më tha se ata shkuan direkt në vendin dhe filluan të gërmojnë. Kërkoj që personi që ka dhënë informacionin të paditet për shpifje,” përfundoi Arsenijevic.