Dhjetëra policë të lënduar në protestën për “Bashkimin e Mbretërisë” në Londër

Prishtinë, 14 shtator

Një protestë masive e organizuar nga aktivisti i ekstremit të djathtë, Tommy Robinson, ka përfunduar me dhunë në qendër të Londrës, duke lënë të lënduar 26 policë – katër prej tyre rëndë, sipas Metropolitan Police.

Në “Unite the Kingdom Rally”, që mblodhi deri në 150 mijë pjesëmarrës, pati përplasje me forcat e rendit, ku ndaj policëve u hodhën shishe dhe mjete të tjera. Zyrtarët e policisë njoftuan për 25 arrestime dhe paralajmëruan se numri mund të rritet, raporton BBC.

Në mesin e folësve ishte edhe miliarderi Elon Musk, i cili u lidh me videomesazh duke folur për “migracion të pakontrolluar” dhe duke bërë thirrje për “ndryshim qeverie” në Britani.

Njëkohësisht, rreth 5 mijë persona morën pjesë në një kundër-protestë të organizuar nga lëvizja “Stand Up To Racism”. Të dyja turmat u ndanë nga kordonët e policisë, por tensionet shpërthyen kur disa protestues të Robinsonit tentuan të kalojnë drejt zonës së kundërshtarëve.

Policia raportoi se disa oficerë pësuan thyerje dhëmbësh, tronditje në kokë dhe lëndime të tjera serioze.

Sekretarja e Brendshme britanike, Shabana Mahmood, dënoi ashpër sulmet ndaj policisë, duke paralajmëruar se “çdokush që merr pjesë në aktivitete kriminale do të përballet me fuqinë e plotë të ligjit”.

Robinson, emri i vërtetë i të cilit është Stephen Yaxley-Lennon, e mbylli tubimin duke premtuar se do të organizojë edhe ngjarje të tjera të ngjashme.

Ai u lirua nga burgu më herët këtë vit, pasi kishte vuajtur një dënim për shpifje ndaj një refugjati sirian.