FSK lëshon flamujt në gjysmështizë në të gjitha kazermat në nderim të viktimave të 11 shtatorit në SHBA

Prishtinë, 11 shtator 2025

Forca e Sigurisë së Kosovës (FSK) ka nderuar sot viktimat e sulmeve terroriste të 11 shtatorit 2001 në Shtetet e Bashkuara të Amerikës, përmes një ceremonie përkujtimore të zhvilluar në të gjitha kazermat e saj në vend.

Në shenjë respekti dhe solidariteti, FSK-ja ka njoftuar se flamujt në kazermat ushtarake janë ulur në gjysmë shtize, si simbol i kujtimit për tragjedinë që ndodhi 24 vite më parë dhe që la mijëra viktima në SHBA.

“Sot, njësitë tona në të gjitha kazermat kanë ulur flamujt në gjysmë shtize, për të nderuar viktimat e sulmeve të 11 shtatorit – një ngjarje që tronditi mbarë botën”, thuhet në njoftimin zyrtar të FSK-së, publikuar në faqen e saj në Facebook.

Në të njëjtin njoftim, FSK-ja thekson përkushtimin e popullit të Kosovës për të qëndruar pranë Shteteve të Bashkuara të Amerikës, si aleati më i madh dhe më i rëndësishëm i vendit.

“Kosova dhe populli i saj do të qëndrojnë gjithmonë krah për krah me miqtë amerikanë – si në ditët e vështira, ashtu edhe në ato të gëzimit”, thuhet më tej në komunikatë.

FSK-ja, si institucion që ka ndërtuar partneritet të ngushtë me ushtrinë amerikane dhe NATO-n, ka shprehur vazhdimisht mirënjohje për rolin vendimtar të SHBA-së në lirinë dhe shtetndërtimin e Kosovës.