Vendoset gurthemeli i memorialit në Prishtinë kushtuar policëve të rënë në detyrë

Prishtinë, 30 gusht 2025

Në kuadër të shënimit të 26-vjetorit të themelimit të Policisë së Kosovës, në lagjen “Dardania” të Prishtinës është vendosur gurthemeli i memorialit kushtuar zyrtarëve policorë të rënë në krye të detyrës. Ceremonia u zhvillua pikërisht në vendin ku më 30 gusht 2007 u vra polici i ri Triumf Riza, vetëm 20-vjeçar.

Kryeministri në detyrë, Albin Kurti, tha se Riza ishte shembull i guximit dhe vendosmërisë. “Para se të ishte polic i guximshëm, Triumf Riza ishte një njeri i guximshëm. Ai u vra mizorisht me breshëri plumbash, vetëm pak muaj pasi ishte inkuadruar në polici, i përkushtuar për t’i shërbyer rendit publik,” theksoi Kurti.

Edhe ministri në detyrë i Punëve të Brendshme, Xhelal Sveçla, theksoi angazhimin e institucioneve për të sjellë para drejtësisë autorët e krimit. “Do të bëjmë çmos që të mos mbeten larg duarve të organeve të drejtësisë,” tha ai.

Ndërkohë, drejtori i përgjithshëm i Policisë së Kosovës, Gazmend Hoxha, e përshkroi Rizën si një oficer shembullor, ndërsa kujtoi se drejtësia deri tani ka dështuar të ndëshkojë fajtorët.

Në ceremoni morën pjesë përfaqësues të institucioneve, policisë dhe familjarë, ndërsa babai i Triumf Rizës falënderoi për përkujdesjen e treguar ndaj të birit.

Që nga themelimi i Policisë së Kosovës, 24 zyrtarë policorë kanë humbur jetën gjatë kryerjes së detyrës, duke lënë një trashëgimi heroizmi dhe përkushtimi ndaj vendit.