Radha të gjata para ASK-së, serbët nxitohen të regjistrohen para skadimit të afatit

29 gusht, 2025

Që nga orët e hershme të mëngjesit, një numër i madh qytetarësh serbë janë mbledhur para objektit të Agjencisë së Statistikave të Kosovës (ASK), për të regjistruar amvisëritë e tyre në kuadër të procesit të regjistrimit të popullsisë. Edhe pse afati zyrtar përfundon më 31 gusht, kjo është dita e fundit e punës për këtë javë, duke e bërë sot mundësinë e fundit për shumë prej tyre.

Procesi i regjistrimit të popullsisë u zhvillua në mes të vitit të kaluar, por një pjesë e konsiderueshme e qytetarëve serbë nuk morën pjesë. Arsyet ishin të ndryshme – nga thirrjet për bojkot të përfaqësuesve politikë të komunitetit serb, deri te pamundësia e regjistruesve për të vizituar të gjitha amvisëritë.

Pas mbylljes së afatit të parë, shumë qytetarë deklaruan se askush nuk kishte shkuar në shtëpitë e tyre për t’i regjistruar. Nga ana tjetër, Agjencia u arsyetua me probleme teknike dhe me faktin se disa regjistrues, kryesisht serbë, ishin tërhequr nga detyra pas thirrjeve për bojkot.

Për të mundësuar përfshirjen e të gjithë qytetarëve, më 11 korrik ASK vendosi ta zgjasë afatin deri më 31 gusht, me theks të veçantë për komunitetin serb. Paralelisht, institucionet kanë paralajmëruar se mosregjistrimi mund të sjellë pasoja ligjore, përfshirë gjoba deri në 2.000 euro dhe masa të tjera administrative.

Në ditët e fundit, dhe sidomos sot, janë parë radhë të gjata para objektit të ASK-së, ku qytetarët presin me orë të tëra për të përmbushur këtë obligim ligjor.