Betim Osmani: Qytetarët do ta gëzojnë urën e re pas 26 vitesh, fletushkat nacionaliste nuk ndalojnë zhvillimin

Mitrovicë Veriore, 25 Gusht 2025

Asamblisti i Kuvendit Komunal të Mitrovicës, Betim Osmani, në emisionin “Ditari” në Tëvë1 ka folur për asfaltimin e urës së re në veri dhe shpërndarjen e fletushkave me mesazhe nacionaliste.

Osmani tha se ndërtimi i urës është i mirëpritur nga qytetarët, pasi për 26 vite ata kanë qenë të privuar nga një infrastrukturë e tillë.

“Qytetarët e mirëpresin urën e re. Shpresoj që ata së shpejti do ta gëzojnë këtë urë e cila u ka munguar tash e 26 vite. Shpresoj që qeveria mos të ndalet me këtë urë në veri, por të vazhdojë me projekte tjera, sepse kemi nevoja të shumta që kanë munguar në këtë pjesë,” tha ai.

Duke folur për fletushkat me përmbajtje nacionaliste që janë shpërndarë sot, ai tha se ato nuk duhet të shihen si pengesë për zhvillimin dhe integrimin.

“Sa mund të jenë nacionaliste, sepse shkruan që mos të dorëzohen për shkak të fshirjes së disa shkrimeve që kanë qenë në veri. Mos të themi që 90% e tyre kanë qenë nacionaliste. Sidomos është mirë, sepse kjo ka treguar se këtu është shteti i shqiptarëve dhe nuk ka ndarje,” është shprehur Osmani.

Sipas tij, pavarësisht tensioneve të shkaktuara nga mesazhet e tilla, proceset e zhvillimit dhe integrimit të veriut nuk duhet të ndalen.