Radovan Vishkoviq jep dorëheqje nga posti i kryeministrit të Republikës Sërpska

 18 gusht 2025

Kryeministri i Republikës Sërpska, Radovan Vishkoviq, ka dhënë dorëheqje nga posti i tij.

Vishkoviq, anëtar i Aleancës së Socialdemokratëve të Pavarur të udhëhequr nga Millorad Dodik, ishte në krye të Qeverisë së entitetit të Bosnje e Hercegovinës që nga viti 2018. Gjatë mandatit të tij, opozita shpesh e ka kritikuar për mënyrën e menaxhimit të resurseve dhe për qasjen e tij ndaj institucioneve shtetërore të Bosnje e Hercegovinës.

Që nga korriku i vitit 2023, ai është nën sanksione të Shteteve të Bashkuara për shkak të veprimeve që, sipas Departamentit amerikan të Thesarit, rrezikojnë Marrëveshjen e Paqes së Dejtonit dhe cenojnë sovranitetin e Bosnje e Hercegovinës. Sanksionet përfshijnë ndalim udhëtimi në SHBA dhe ngrirjen e pasurisë nën juridiksionin amerikan.

Përveç kësaj, Vishkoviq është një nga të dyshuarit në hetimet e Prokurorisë së Bosnje e Hercegovinës për veprën penale të “sulmit ndaj rendit kushtetues”, ku të akuzuar janë edhe presidenti i Republikës Sërpska, Millorad Dodik, dhe kryetari i Kuvendit Popullor, Nenad Stevandiq.

Dorëheqja e tij shënon një zhvillim të rëndësishëm në skenën politike të entitetit, ndërkohë që pritet reagimi i institucioneve dhe partive politike mbi pasardhësin në krye të qeverisë.