Fetoshi: Propaganda serbo-ruse paraqet rrezik të lartë për Kosovën

Prishtinë, 12 Gusht 2025

Në sesionin “Kërcënimet dhe rreziqet jokonvencionale të sigurisë” të Konferencës së 8-të të Ambasadorëve, që po mbahet në Prishtinë, drejtori i Institutit “Octopus”, Arben Fetoshi, ka paralajmëruar për rrezikun e lartë që paraqet propaganda serbe ndaj sigurisë së Kosovës.

Sipas tij, në rrethanat aktuale të përplasjeve gjeopolitike, “Kosova është ‘vijë fronti’ mes rendit demokratik dhe armiqve të tij; është hapësira e betejës mes të vërtetës dhe deformimit të saj, si një parakusht për qëllimet e politikës ekspansioniste të Serbisë dhe Rusisë”.

Fetoshi theksoi se propaganda serbe është pjesë e një strategjie shtetërore afatgjatë, e koordinuar nga institucionet politike, diplomatike, mediatike dhe fetare të Serbisë, e cila është e sinkronizuar me Rusinë dhe ka prodhuar pasoja konkrete për Kosovën. Ai përmendi ndër to pengimin e njohjeve të reja, bllokimin e anëtarësimit në organizata ndërkombëtare dhe dëmtimin e kohezionit të brendshëm.

Duke e krahasuar propagandën si “armë strategjike” që i paraprin veprimeve agresive, Fetoshi solli shembuj konkretë si sulmi në Banjskë të Zveçanit (2023) dhe teknikat e njohura të dezinformimit, përfshirë “rrëmbimin emocional” dhe “gaslighting”-un.

Ai kërkoi masa të qarta për neutralizimin e këtij rreziku, përfshirë: Krijimin e një Qendre Kombëtare kundër Dezinformimit; Rritjen e kapaciteteve diplomatike për identifikimin e narrativave manipuluese; Forcimin e partneritetit me aleatët, NATO-n dhe BE-në; Aktivizimin e shoqërisë civile në luftën kundër propagandës, sipas modelit baltik.

“Në një mjedis ku kërcënimet jokonvencionale shpesh i paraprijnë luftën konvencionale, diplomacia është vija e parë e mbrojtjes strategjike. Mbrojtja e Kosovës është mbrojtje e rendit ndërkombëtar, po aq sa edhe mbrojtja e Ukrainës”, u shpreh Fetoshi, duke e cilësuar diplomacinë si vijën e parë të mbrojtjes strategjike në kushtet e kërcënimeve hibride.