Kurti paralajmëron për rrezikun nga Serbia – ngre edhe çështjen e shqiptarëve në Luginën e Preshevës

Shën Stefan, 22 Tetor 2026 18:05
Në seancën plenare të Samitit të 13-të të Procesit të Berlinit, që po mbahet në Mal të Zi, Kryeministri i Kosovës, Albin Kurti, ka theksuar se Kosova ka përmbushur detyrimet që varen nga ajo, ndërsa aplikimi për anëtarësim në BE, i dorëzuar në dhjetor të vitit 2022, vazhdon të presë një vendim nga institucionet evropiane.
Një pjesë të rëndësishme të fjalimit, Kurti ia ka kushtuar çështjeve të sigurisë dhe sulmeve ndaj infrastrukturës kritike, duke paralajmëruar për rrezikun që, sipas tij, paraqesin veprimet destabilizuese ndaj demokracive evropiane.
Ai ka përmendur sulmin terrorist në Banjskë, më 24 shtator 2023, ku u vra rreshteri i Policisë së Kosovës, Afrim Bunjaku, si dhe shpërthimin në kanalin e ujit Ibër-Lepenc, në Varagë, në nëntor të vitit 2024.
Kryeministri ka veçuar Luginën e Preshevës, duke pretenduar se shqiptarët atje po përjashtohen gradualisht nga jeta institucionale, publike dhe qytetare.

“Ju bëj thirrje që ta shikoni nga afër Luginën e Preshevës, ku shqiptarët po shtyhen, hap pas hapi, jashtë jetës institucionale, publike dhe qytetare, derisa qëndrimi bëhet më i vështirë sesa largimi”, është shprehur Kurti.