Sveçla: Epoka e spastrimit etnik ka marrë fund, Paunoviq shpallet “non grata” në Republikën e Kosovës

Prishtinë, 14 korrik 2026 22:05

Ministri i Punëve të Brendshme i Republikës së Kosovës, Xhelal Sveçla, ka njoftuar se ka shpallur “persona non grata” ministren e Administratës Publike dhe Vetëqeverisjes Lokale të Serbisë, Snezhana Paunoviq, duke i ndaluar asaj përgjithmonë hyrjen dhe kalimin tranzit në territorin e Republikës së Kosovës.

Vendimi vjen pas deklaratave të Paunoviq, të cilat Sveçla i cilësoi si vazhdimësi të politikave të spastrimit etnik ndaj shqiptarëve dhe si retorikë që cenon rendin kushtetues, sovranitetin dhe sigurinë e Kosovës.

Sipas ministrit, deklaratat e ministres serbe rikthejnë narrativën e politikave të regjimit të Slobodan Millosheviqit, duke theksuar se Serbia nuk ka hequr dorë nga projektet që synonin dëbimin dhe spastrimin etnik të shqiptarëve.

Sveçla tha se gjuha e përdorur nga zyrtarja serbe është e papranueshme dhe u bëri thirrje shteteve demokratike ta dënojnë një retorikë të tillë, e cila, sipas tij, nxit urrejtje, destabilizim dhe rikthim.

Duke bërë të ditur vendimin për shpalljen e saj person të padëshirueshëm, Sveçla theksoi se epoka e shtypjes, masakrave dhe spastrimit etnik të shqiptarëve ka marrë fund dhe se Kosova është sot një shtet sovran e demokratik me institucione që mbrojnë rendin kushtetues, integritetin territorial dhe sigurinë e qytetarëve.

Ai shtoi se institucionet e Kosovës do të vazhdojnë të kërkojnë drejtësi për krimet e luftës dhe se çdo përpjekje për të kërcënuar sovranitetin e vendit apo për të ringjallur ideologjitë e spastrimit etnik do të përballet me përgjigje të vendosur, ligjore dhe institucionale.