Igor Popoviq e ndryshoi deklaratën sapo hyri në Serbi – si u mashtrua publiku serb

11 gusht 2025

Rasti i zëvendësdrejtorit të ashtuquajtur Zyrës për Kosovë në Qeverinë e Serbisë, Igor Popoviq, ka zbuluar kontradikta serioze në qëndrimet e zyrtarëve serbë dhe përpjekjet e qeverisë për të manipuluar opinionin publik.

Popoviq u arrestua më 18 korrik në pikëkalimin administrativ në Bërnjak, pas një deklarate në Hoçën e Madhe ku e quajti UÇK-në “organizatë terroriste”. Gjykata Themelore në Prishtinë e dënoi me gjobë prej 3 mijë eurosh, ndalim hyrjeje për dy vjet dhe shpenzime gjyqësore.

Sipas dokumenteve zyrtare, Popoviq e pranoi fajësinë vullnetarisht para gjykatës, ndërsa avokati i tij deklaroi se nuk do të kishte ankesë ndaj vendimit. Marrëveshja për pranimin e fajësisë u bë qartë dhe formalisht.

Mirëpo, sapo kaloi kufirin dhe hyri në territorin e Serbisë, Popoviq e ndryshoi plotësisht narrativën. Ndryshe nga ajo që tha para trupit gjykues, në Serbi ai deklaroi se “nuk ka pasur marrëveshje me drejtësinë e Kosovës” dhe se “nuk pranon asnjë faj për atë që ka thënë”. Ai falënderoi shtetin serb dhe presidentin Aleksandar Vuçiq për mbështetjen, duke u paraqitur si viktimë e një procesi politik të montuar.

Ministria e Drejtësisë së Serbisë doli me një deklaratë duke pretenduar se marrëveshja ishte bërë “nën presion” dhe nuk ka efekt juridik për Serbinë apo të drejtën ndërkombëtare. Por ekspertët juridikë e kundërshtojnë këtë.

Profesori i së drejtës, Dejan Miroviq, e cilëson këtë si “manipulim të hapur të publikut serb”, me qëllim ruajtjen e imazhit të “luftës për Kosovën”, ndërkohë që në prapaskenë bëhen kompromise.

“Marrëveshja e nënshkruar nga Popoviq ka fuqi të plotë ligjore, njësoj si Marrëveshja e Ohrit, të cilën Serbia zyrtarisht thotë se nuk e ka pranuar, por që tashmë është pjesë e kapitullit 35 në negociatat me BE-në,” thekson Miroviq. Ai shton se Popoviq nuk e ka pranuar fajësinë vetëm në emrin e tij personal, por me miratimin e Vuçiqit, dhe se rasti tregon një strategji për të “mashtruar opinionin dhe për të fshehur marrëveshjet e bëra nën tryezë”.

Edhe Nikola Stankoviq nga lëvizja “Kreni-Promeni” e sheh këtë rast si “shembull tipik të propagandës shtetërore”.

“Shteti e paraqet Popoviqin si hero që u përball me drejtësinë e Kosovës, ndërkohë që ai e ka pranuar fajësinë. Kjo është politikë me dy fytyra: një për Prishtinën dhe një për Beogradin,” tha ai. Sipas Stankoviqit, qëllimi i pushtetit është të mbajë qytetarët në iluzionin se Serbia po “lufton për Kosovën”, ndërsa në realitet nënshkruhen marrëveshje që përbëjnë kapitullim të heshtur.

Të premten, Gjykata Themelore në Prishtinë e dënoi Popoviqin me gjashtë muaj burg për nxitje të urrejtjes dhe mosdurimit, por dënimi iu zëvendësua me gjobë prej 3 mijë eurosh dhe ndalim hyrjeje në Kosovë për dy vjet. Gjykata miratoi marrëveshjen mes Prokurorisë Speciale dhe Popoviqit, me të cilën ai pranoi fajësinë.