Osmani u bën thirrje organeve të drejtësisë për veprim urgjent pas vrasjes së trefishtë në Gjilan

Osmani u bën thirrje organeve të drejtësisë për veprim urgjent pas vrasjes së trefishtë në Gjilan

Presidentja e Kosovës, Vjosa Osmani, u ka bërë thirrje organeve të rendit dhe drejtësisë që të kapin sa më shpejt autorët e vrasjes së trefishtë në Gjilan dhe t’i sjellin para drejtësisë.

Ajo ka shprehur keqardhje që të dyshuarit për këtë krim, vitin e kaluar, janë liruar nga institucionet e drejtësisë pas një kohe të shkurtër në paraburgim, ndonëse akuzoheshin për vepra të rënda penale.

“Presidentja përcjell ngushëllimet më të sinqerta për familjet e viktimave dhe kërkon nga organet kompetente që autorët e këtij akti makabër të dalin para drejtësisë dhe të përballen me përgjegjësinë e plotë ligjore. Është për keqardhje që vitin e kaluar të njëjtit persona u liruan nga paraburgimi pas një kohe shumë të shkurtër, përkundër akuzave për vepra të rënda”, thuhet në reagimin e Presidencës.

Nga Kabineti i Presidentes kanë reaguar edhe për publikimin në media të një fotografie ku Osmani shihet me të dyshuarin Mefail Shkodra.

“Është shqetësues manipulimi me qëllim dezinformimin e opinionit publik, duke përdorur fotografi të realizuara në ngjarje publike, ku autori i këtyre veprave ka pozuar me shumë figura publike. Këto imazhe janë bërë gjatë një aktiviteti festiv të Ambasadës së Republikës së Shqipërisë në Kosovë, ku morën pjesë përfaqësues institucionalë, personalitete nga politika, të ftuar të tjerë dhe qytetarë. Brenda vitit, Presidentja del në fotografi me mijëra pjesëmarrës në aktivitete publike, të cilët nuk i njeh dhe nuk mund të dijë për veprimtarinë e tyre. Prandaj, aludimet për kinse ‘shoqërim’ janë shpifje. Presidentja përsërit thirrjen që organet e rendit dhe drejtësisë të veprojnë sipas ligjit dhe të sigurojnë që vrasësi të marrë dënimin e merituar”, thuhet në reagim.