Letër Dhomave të Specializuara nga profesorë dhe shoqëria civile

Një grup profesorësh të njohur të Universitetit të Prishtinës dhe universiteteve ndërkombëtare, së bashku me përfaqësues të shoqërisë civile, i janë drejtuar me letër publike Dhomave të Specializuara të Hagës, duke shprehur shqetësimin e thellë për pranimin e provave të siguruara nga Ministria e Brendshme e Serbisë dhe institucionet tjera të Beogradit.

Sipas tyre, përdorimi i dokumenteve të prodhuara nga strukturat shtetërore serbe gjatë viteve ‘90 – përfshirë edhe ato të shërbimeve të sigurisë – jo vetëm që është i papranueshëm, por përbën edhe rrezik serioz për legjitimitetin e procesit gjyqësor dhe besimin e qytetarëve në drejtësinë ndërkombëtare.

“Ky zhvillim ka kontribuar në përshkallëzimin e krizës së besimit publik ndaj këtij institucioni, i cili po shihet gjithnjë e më shumë me skepticizëm nga qytetarët që supozohet t’i shërbejë”, thuhet në letër. “Legjitimiteti i këtij procesi nuk duhet të bazohet vetëm në përmbushjen formale të rregullave, por në nevojën për të përmbushur standarde të paanshmërisë që qytetarët e Kosovës me të drejtë i presin.”

Në letrën e tyre, nënshkruesit rikujtojnë se Tribunali Penal Ndërkombëtar për ish-Jugosllavinë ka dokumentuar me prova të shumta se institucionet serbe, si MUP-i dhe mekanizmat tjerë të sigurisë, kanë qenë të përfshira drejtpërdrejt në krime sistematike ndaj civilëve shqiptarë në Kosovë. Prandaj, sipas tyre, pranimi i provave të tilla bie ndesh me çdo parim të drejtësisë së paanshme dhe rrezikon integritetin e të gjithë procesit.

Autorët e letrës bëjnë thirrje për një përfshirje më të gjerë të institucioneve të Kosovës dhe shoqërisë civile në rishikimin e ligjeve dhe procedurave që rregullojnë funksionimin e Dhomave të Specializuara. Ata kërkojnë reforma që garantojnë gjykim të drejtë, mbrojtje të barabartë për të akuzuarit dhe viktimat, si dhe transparencë të plotë në çdo fazë të procesit.

Letra është nënshkruar nga akademikë dhe ekspertë të njohur, përfshirë:

• Dr. Ramadan Ilazi – Drejtor i Humbult në Qendrën Kosovare për Studime të Sigurisë (QKSS)
• Dr. Arben Hajrullahu – Profesor, Departamenti i Shkencave Politike, Universiteti i Prishtinës
• Dr. Linda Gusia – Profesore Asistente, Departamenti i Sociologjisë, Universiteti i Prishtinës
• Mr. Agon Maliqi – Analist politik dhe opinionist, Policy Thinker/Median
• Dr. Bekim Baliqi – Profesor i Asociuar, Departamenti i Shkencave Politike, Universiteti i Prishtinës
• Dr. Lulzim Peci – Drejtor Ekzekutiv, KIPRED
• Dr. Blendi Kajsiu – Profesor, Universiteti i Evropës Juglindore (UEJL)
• Mr. Bekim Blakaj – Drejtor Ekzekutiv, Fondi për të Drejtën Humanitare Kosovë (FDHK)
• Mr. Kushtrim Shaipi – Drejtor Ekzekutiv, Demokraci Plus (D+)
• Mr. Fisnik Rexhepi – Humbultues në Shoqatën për Politikë të Jashtme, Universiteti i Prishtinës
• Dr. Gëzim Visoka – Profesor, Universiteti Dublin City

Kjo letër vjen në një kohë kur debati publik mbi drejtësinë e Dhomave të Specializuara është gjithnjë e më i ndezur, ndërsa besimi i qytetarëve në këtë institucion është në pikën më të ulët.