Forcimi i FSK-së, 515 rekrutë të rinj nisin rrugëtimin ushtarak

Prishtinë, 23 tetor 2026 2026 20:45

Forca e Sigurisë së Kosovës po zgjeron kapacitetet e saj njerëzore dhe profesionale, me 515 rekrutë të rinj të gjeneratës 02-2026, të cilët kanë dhënë betimin për t’i shërbyer Republikës së Kosovës.

Në një ceremoni solemne, 515 rekrutët u zotuan për besnikëri ndaj Republikës së Kosovës, respektimin e Kushtetutës dhe ligjeve të vendit, si dhe për përmbushjen e misionit të tyre në shërbim të vendit.

Në ceremoni morën pjesë përfaqësues të lartë të institucioneve të Kosovës, përfshirë Kryetaren e Kuvendit, Albulena Haxhiu, Kryeministrin Albin Kurti, Ministrin e Mbrojtjes, Ejup Maqedonci, dhe Komandantin e FSK-së, gjenerallejtënant Bashkim Jashari, si dhe familjarë të rekrutëve dhe përfaqësues ndërkombëtarë.

Me 515 pjesëtarë, kjo është gjenerata më e madhe e rekrutëve deri më tani, duke përfaqësuar një shtim të rëndësishëm të burimeve njerëzore të FSK-së. Rekrutimi i kësaj gjenerate kontribuon në zgjerimin e kapaciteteve operative, rritjen e gatishmërisë dhe krijimin e kuadrove të reja profesionale për strukturat e FSK-së.

Betimi shënon fillimin e një etape të re për rekrutët, të cilët do t’i nënshtrohen trajnimeve dhe përgatitjeve të vazhdueshme ushtarake, me synim zhvillimin e aftësive profesionale, disiplinës dhe gatishmërisë për përmbushjen e detyrave.

Përmes investimit në personel, trajnim dhe profesionalizim, FSK-ja synon të avancojë kapacitetet e saj dhe të forcojë aftësinë për përmbushjen e misionit të saj në mbrojtje të sovranitetit dhe integritetit territorial të Republikës së Kosovës.

Gjenerata e re e rekrutëve shihet kështu si një tjetër hap në procesin e zhvillimit të FSK-së dhe ndërtimit të një force më të madhe, më profesionale dhe më të përgatitur për sfidat e sigurisë.