Pas 27 vjetësh pritjeje, Idriz Rrecaj rivarroset në tokën e Kosovës së lirë

Skenderaj, 16 tetor 2026 14:42

Heroi i Kosovës, Idriz Rrecaj, do të rivarroset sot në Skenderaj, 27 vjet pasi u rrëmbye dhe u zhduk me dhunë gjatë luftës në Kosovë. Djali i tij, Shpëtim Rrecaj, ka thënë se familja më në fund ka marrë përgjigjen që e priti për dekada për fatin e babait të tij.

Në akademinë përkujtimore të mbajtur në Skenderaj, Shpëtim Rrecaj ka kujtuar dhimbjen e familjes dhe mungesën e babait, i cili u zhduk në prill të vitit 1999.

“Për 27 vjet familjen tonë e ka përcjellë pyetja ‘ku është babai juaj Idriz Rrecaj?’. Sot më në fund e kemi një përgjigje, babai im po kthehet në tokën e Kosovës së lirë për të cilën jetoi dhe sakrifikoi”, ka deklaruar ai.

Shpëtim Rrecaj ka theksuar se babai i tij ishte intelektual dhe veprimtar, i cili, së bashku me 22 intelektualë të tjerë, u rrëmbye gjatë luftës në Kosovë.