Millosh Antoviq pranon fajësinë për sulmin ndaj KFOR-it – dënohet me 5 vjet burg dhe 20 mijë euro gjobë

I akuzuari për sulmin ndaj pjesëtarëve të KFOR-it në Zveçan, Millosh Antoviq, ka pranuar fajësinë në marrëveshje me Prokurorinë Speciale të Kosovës.

Sipas aktakuzës së paraqitur më 30 mars të këtij viti në Gjykatën Themelore në Prishtinë, Antoviq, i njohur me nofkën “Xhaja”, ngarkohej me katër vepra penale: sulm ndaj personit zyrtar, pjesëmarrje në turmë që kryen vepra penale – huliganizëm, blerje dhe shpërndarje të paautorizuar të narkotikëve dhe posedim të armëve pa leje.

Sulmi për të cilin akuzohet ndodhi më 29 maj 2023 në Zveçan, ku mbetën të lënduar disa ushtarë të KFOR-it dhe zyrtarë të Policisë së Kosovës.

Gjatë seancës gjyqësore, Antoviq deklaroi se është i vetëdijshëm për pranimin e fajësisë dhe heqjen dorë nga e drejta për gjykim të rregullt, thirrjen e dëshmitarëve dhe prezantimin e provave.

Prokurori Bekim Kodraliu kërkoi që të shqiptohet një dënim unik prej 5 vitesh burgim dhe një gjobë prej 20 mijë eurosh, duke përfshirë edhe kohën e kaluar në paraburgim. Po ashtu, ai kërkoi që masa e paraburgimit të mos ndërpritet deri në hyrjen në fuqi të aktgjykimit.

Gjykata e miratoi marrëveshjen për pranimin e fajësisë, ndërsa mbrojtja kërkoi që gjoba të mund të paguhet me këste.