Sot vazhdon seanca konstituive e Kuvendit

Prishtinë, 13 shtator 2026 08:40

Kuvendi i Kosovës pritet të vazhdojë sot seancën konstituive, me fillim nga ora 10:00, në sallën e seancave.

Në rendin e ditës është pika e katërt, zgjedhja e nënkryetarëve të Kuvendit.

Në seancën e së premtes nuk u votua kandidati i Partisë Demokratike të Kosovës për nënkryetar të Kuvendit. Pas kësaj, PDK-ja së bashku me Aleancën kanë deklaruar se nuk do të marrin pjesë në vazhdimin e seancës, ndërsa kanë bërë të ditur se do t’i drejtohen Gjykatës Kushtetuese.

Të premten, kryetari i Lëvizjes Vetëvendosje, Albin Kurti, ka thënë se kanë nevojë për takim sqarues me kryetarin e Partisë Demokratike të Kosovës, Bedri Hamza, në mënyrë që të diskutohet se cili kandidat i PDK-së mund të propozohet për nënkryetar të Kuvendit.

Po këtë ditë, vazhdimi i seancës konstituive u ndërpre dy herë. Herën e parë u ndërpre pasi PDK-ja lëshoi sallën meqë Lëvizja Vetëvendosje nuk ia votoi Vlora Çitaku për nënkryetare, anise PDK-ja e votoi Ardian Golën. Hamza më pas deklaroi se nuk kanë më arsye të marrin pjesë në asnjë seancë dhe paralajmëroi se do t’i drejtohen Gjykatës Kushtetuese.

Kurse, Kurti ka thënë se emri i Çitakut nuk mund të votohet pasi ka dalë kundër çdo propozimi të Lëvizjes Vetëvendosje.

Kurti u shpreh se ky takim është në interesin e Hamzës, meqë sipas tij, është PDK-ja ajo që ka nevojë për votat e Lëvizjes Vetëvendosje për zgjedhjen e kandidatit të saj nënkryetar kuvendi, derisa partisë se tij edhe vota kundër i kryen punë për zgjedhjen e presidentit.

Po të premten pasdite, nisi për herë të dytë seanca, ku kryetarja e Kuvendit, Albulena Haxhiu, tentoi ta vazhdonte procedurën me zgjedhjen e nënkryetarit nga radhët e LDK-së.

Megjithatë, deputetët e LDK-së u larguan nga salla, duke kundërshtuar këtë veprim dhe duke e konsideruar shkelje të procedurës.

Për shkak të këtyre përplasjeve, vazhdimi i seancës së sotme pritet të zhvillohet nën tensione, ndërsa mbetet e paqartë nëse do të ketë pjesëmarrje të mjaftueshme për të proceduar me zgjedhjen e nënkryetarëve