Ulutash para largimit: Situata e sigurisë në Kosovë është përmirësuar ndjeshëm

Prishtinë, 11 shtator 2026 19:08

Në përfundim të mandatit të tij të dytë në Kosovë, komandanti i KFOR-it, gjeneralmajori Ozkan Ulutash, ka deklaruar në një intervistë ekskluzive për Telegrafin se situata e sigurisë në Kosovë është përmirësuar ndjeshëm, por sfidat vazhdojnë të jenë të pranishme.

Ai ka bërë të ditur se NATO-ja ka nisur përshtatjen graduale të pranisë së KFOR-it, proces që mund të kthehet mbrapsht nëse situata përkeqësohet.

Duke folur për Urën e Ibrit, Ulutash ka theksuar se KFOR-i nuk ka mandat të vendosë për hapjen e saj. Sipas tij, rruga drejt stabilitetit të qëndrueshëm është politike dhe jo ushtarake.

Gjeneralmajori turk ka folur edhe për bashkëpunimin e KFOR-it me institucionet e Kosovës dhe mekanizmat e tjerë të sigurisë, duke e cilësuar atë profesional, konstruktiv dhe të rregullt.

Ulutash ka krahasuar gjithashtu situatën aktuale të sigurisë me atë të fillimit të mandatit të tij, duke theksuar se përmirësimi i situatës i ka mundësuar NATO-s të nisë përshtatjen graduale të pranisë së KFOR-it.