Krasniqi kërkon nga tri komunat e veriut emërimin e nënkryetarëve për komunitete

Prishtinë, 11 shtator 2026 11:12

Ministri në detyrë i Administrimit të Pushtetit Lokal, Elbert Krasniqi, u ka dërguar kërkesë zyrtare kryetarëve të Mitrovicës së Veriut, Zveçanit dhe Zubin-Potokut për përmbushjen e obligimeve ligjore lidhur me përfaqësimin e komuniteteve.

Krasniqi ka kërkuar nga këto tri komuna që të emërojnë nënkryetarët për komunitete, si dhe zëvendëskryesuesit e kuvendeve komunale për komunitete.

Sipas tij, këto nuk janë çështje që varen nga vullneti politik, por obligime të përcaktuara me legjislacionin në fuqi.

“Si MAPL, do të vazhdojmë të kërkojmë nga të gjitha komunat respektimin dhe zbatimin e plotë të legjislacionit për vetëqeverisjen lokale, duke garantuar përfaqësim, gjithëpërfshirje dhe trajtim të barabartë për të gjithë qytetarët dhe komunitetet”, ka deklaruar Krasniqi.

Ai ka përmendur edhe Gjakovën, Lipjanin dhe Ferizajn, të cilat, sipas tij, kanë ndërmarrë hapa për përfaqësimin e komuniteteve përmes vullnetit institucional.

Krasniqi ka theksuar se komunat që kanë obligim ligjor duhet t’i përmbushin këto përgjegjësi.